PAF mosuporta sa limpyong piniliay

CEBU, Philippines - Umaabot nga eleksyon gipangandaman na usab sa Philippine Air Force alang sa pagsuporta sa kahapsay ug kalinaw dinhi sa kinatibuk-ang Visayas.

Kini ang giluwatang pamahayag ni Lt. Gen. Oscar Ravena ang Commanding General sa Philippine Air Force atol sa pagsaulog sa ika-31 nga anibersaryo sa 2nd Air Division sa PAF sa Mactan Benito Ebuen Air Base (MBEAB) sa dakbayan sa Lapulapu sa milabay’ng adlaw.

Matud pa ni Ravena magpadayon ang pag-monitor sa kalinaw ubos sa hurisdiksyon sa 2nd Air Division dinhi sa Kabisayaan gikan sa rehiyon 6, 7 ug 8 sa natad sa insurhensiya.

Matud pa niini magpadayon ang koordinasyon ug kooperasyon sa mga air assets sa PAF sa mga lokal nga kagamhanan ug kapolisan sa pagpakgang sa mga kalihukan sa walhong pundok nga nakigbatok sa gobiyerno.

Gipahimangnoan usab ni Ravena ang mga sakop nga dili mag-abusar sa katungdanan ug himuong ehemplo sa uban ang ilang maayong binuhatan aron respetuhon usab sa publiko ang militar.

Samtang si PAF Brig. Gen. Edgardo Mendoza ang 560th ABW Commander mipadayag nga dunay bag-o nilang palitunong mga “Night Capable Attack Helicopters" nga karon kasamtangang naa sa bidding process nga kabahin sa modernisasyon sa PAF.

Kumparar sa mga air assets kaniadto, ang PAF duna nay kapabilidad nga makapalupad bisan gabii ug giingong dako na kining bentaha aron batukan ang mga kaaway sa gobiyerno.

Samtang gipaninguha sa PAF nga mabalik ang operasyon sa mga gubaong air assets sama sa C-130s nga maoy nag-unang workhorse sa airlift capability sa PAF. Sa pagkakaron usa na lamang niini ang operational nga maoy gigamit sa mga militar. - Bong Soriano (BANAT NEWS)