Soc papalito'g motorsiklo

CEBU, Philippines - Si Mayor Socrates Fernandez sa dakbayan sa Talisay giawhag sa konseho sa siyudad nga mopalit og laing motorsiklo nga magamit sa mga sakop sa Traffic Commission (TC) sa panahon sa ilang traffic operation.

Ang resolusyon numero 2010-03-2 nga giduso ni Konsehal Sabeniano Abatayo, chairman sa Committee on Transportation and Public Utilities nagsugyot nga ang budget nga gamiton sa pagpalit og motorsiklo maggikan sa traffic trust fund.

Ang maong resolusyon nagkanayon nga labing mapuslan ang mga personnel sa TC sa operasyon sa trapiko kung aduna kini kaugalingong motorsiklo nga magamit.

Ang nahisgutang motorsiklo magamit usab sa pagpatrolya nila sa kadalanan sa siyudad aron mabantayan ang mga badlongong motorista.

Sa laing bahin, si Superintendent Henry Binas, hepe sa Talisay City Police Station sa pakighinabi niini sa Banat News kagahapon nagkanayon nga dakong tabang kanila ang mga sakop sa TC ug mga enforcer sa pagmando sa trapiko diha sa kadalanan sa siyudad.

Gawas niini ang mga enforcer ug sakop sa TC mitabang usab kanila og pagbadlong sa mga abusadong motorista, matud pa ni Binas. - Brenda D. Batuto (BANAT NEWS)