2 nakuhaa'g laptop sa mangingilad

CEBU, Philippines - Duha ka managhigala nakuhaan sa ilang mga laptop sa usa ka nakig-amigo kanila pinaagi sa Friendster website didto sa Hapuhap Spa, sa V. Rama Avenue ning dakbayan sa Sugbo niadtong Lunes sa gabii.

Ang mga biktima giila nga sila si Mario Enrico Pacana Jr., 20, nga taga El Felibusterismo, barangay Ermita, ug Thamer Jorge Mascarinas, 21, nga taga Sunrise Village, barangay Pardo, pulos sakop sa dakbayan sa Sugbo, samtang ang suspetsado giila usab nila nga si Dennis Gaisano Cojuangco nga taga Maria Luisa Village, sa gihapon ning dakbayan.

Ang mga biktima nga nagtibi atubangan sa kapolisan mitug-an nga bag-o lang nilang nakaila pinaagi sa Friendster website ang suspetsado dihang nakigkita kini personal kanila unya gipanghuwaman ang ilang laptop kay mipasangil nga gikan siya sa gawas sa nasud ug wala kaayo masuhito dinhi sa dakbayan.

Uban sa pasalig nga abangan sila og dakong kantidad, misugot ang duha ka biktima apan taudtaud gilipatlipat lamang sila sa suspetsado dayong kahanaw niini daw aso.

Padayong gipangita karon sa kapolisan ang suspetsado. - Mary Jane R. Ouano (BANAT NEWS)