Chinese national naghikog

CEBU, Philippines - Usa ka babayeng Chinese national ang napalgang patay sulod sa kasilyas sa ilang giabangang kwarto sa Ang Building sa Junquera Extn. Barangay Santa Cruz pasado alas 9 sa buntag kagahapon.

Si Yuye Cai, 56, lumad nga taga Fujian Province sa nasud sa China ug kasamtangang nagpuyo sa nahisgutang building uban sa iyang bana ug mga anak.

Sumala pa sa imbestigasyon ni SPO3 Rey Cuyos sa Homicide Section sa Cebu City Police Office ang anak ni Cai nga si Libunai Chen maoy nakadiskubre sa patay'ng lawas niini.

Nagtuo ang kapolisan nga posibleng naghikog ang maong babaye tungod kay walay nakitang timailhang may foul play sa patay'ng lawas niini gawas lang sa marka sa pisi diha sa liog.

Ang anak ni Cai pagkakita sa nagbitay nga inahan daling mitawag sa iyang igsuon ug ilang gitabang apan patay na kini.

Sa pakighinabi sa Banat News kang Cuyos nagkanayon kini nga dili makasabot og pinulungang Englis ang pamilya sa namatay hinungdan nga ang higala sa mga Yuye nga si Junie Chan maoy nagsilbi nilang translator.

Diha nila mahibaw-ing gikan sa anak sa namatay nga si Kunli Chen mitug-an nga duna silay domestic problem kon problema sa pamilya ug mao karon ang ilang gidudahang maoy hinungdan sa paghikog sa ilang inahan.

Nakuha diha sa kasilyas ang pisi nga giingong maoy gihigot sa liog sa namatay nga may gitas-ong 12 ka tiil.

Ang kapolisan gikatakdang mopatabang unya sa Liaison Foreign Officer sa embahada sa China aron pagkuha og dugang impormasyon kabahin sa pamilya sa namatay nga giingong usa pa ka tuig nga nagpuyo dinhi.

Ang pamilya ni Cai ug pipila ka kaliwat maoy nag-okupar sa 3rd floor sa maong building ug giingong nanginabuhi dinhi pinaagi sa buy and sell nga negosyo.

Samtang nasuta usab base sa passport ug visa ni Cai nga Agosto 6, 2011 pa kini mo-expire. Gisuwayan pa unta pagkuha sa kapolisan ang habig sa kapikas ni Cai apan wala na kini nila mahinabi tungod kay nagsige na kini og danguyngoy tungod sa kasubo. – BANAT NEWS