CEBU, Philippines - Negosyante nagpabuto sa iyang armas nakaangol sa tulo niya ka mga empleyado diha sa Palmas Verdes Subdivision sa barangay Tabok dakbayan sa Mandaue sa milabay’ng gabii.
Ang suspetsadong nagpabuto sa iyang armas nga kalibre 45 mao si Sultan Cayner Macalinog Bao, 29, residente sa maong dapit ug usa ka negosyante.
Samtang ang mga biktima mao sila ni Diosdada Anadia, 23, dalaga yaya sa anak sa suspetsado ug ang duha ka tindera niining sila si Remedios Anadia,20, igsuon ni Diosdada lumad sa Isla Jandayan, Getafe, Bohol ug Jennifer Dayota, 18, residente sa barangay Ermita dakbayan sa Sugbu pulos mga katabang ni Bao.
Matud pa ni MCPO OIC Director Sr. Supt. Noel Gillamac base sa imbestigasyon sa Station 3, si Bao ug ang kapikas niining si Nenita nagkalalis niadtong tungura nga misantop sa pagpabuto sa suspek makaduha ka higayon sa iyang armas tumong ngadto sa salog sa ilang panimalay.
Wala makabantay si Bao nga ang bala sa iyang armas mibanda ug didto unang miigo sa duha ka paa ni Diosdada ug milahos sa walang kamot ni Remedios, samtang si Dayota naigo usab sa walang paa.
Ang mga biktima gidali og dala sa suspek ngadto sa Cebu Community Hospital sa dakbayan sa Sugbu, diha na usab sa maong tambalanan mitahan si Bao sa mga mirespondeng polis sa Mandaue apan wala sa posesyon niini ang armas nga gigamit niini sa pagpabuto.
Matud pa ni Insp. Stephen Amamag ang Deputy Chief sa Station 3 nakuha gikan sa dapit nahitaboan ang duha ka basiyo sa kalibre 45, miangkon hinuon si Bao sa salaod ug mipakita sa lisensya sa armas ngadto sa kapolisan.
Gumikan kay usa kini ka negosyante maong nakakuha kini og lisensiya sa armas, apan gumikan sa pagpabuto niini og armas bisan sa sulod sa ilang balay ug nakaangol og tulo gibilanggo karon si Bao.
Kasong illegal discharge ug physical injuries ang gikatakdang ipasaka batok sa suspek. - BANAT NEWS