Police office pa-esplikahon

CEBU, Philippines - Gipadad-an na og ‘urgent exparte motion’ ang opisina sa Cebu City Police Office (CCPO), Provincial Regional Office (PRO-7) ug Regional Security Agencies and Guards Supervisory (RSAGSSU-7) gikan sa Ombudsman Visayas nga nagmando kanilang paesplikahon sulod sa lima ka adlaw nganong hangtud karon wala pa nila ma-serve ang warrant of arrest ni SPO1 Adonis Dumpit.

Ang mga director nga sila Lani-O Nerez sa PRO-7, Patrocinio Comendador ug Supt. Rex Derilo sa RSAGSSU-7 maoy giapod-aporan sa ‘urgent exparte motion’ nga gipirmahan sa Ombudsman Visayas, Alfred Yann Oguis ug chief prosecutor Gaudiso Melendez.

Sa pakighinabi ni Cebu City Director Patrocinio Comendador nagkanayon nga ilaha nang gihatod sa panimalay ni Dumpit ang warrant of arrest apan wala kini sa ilang panimalay.

Dugang pa ni Comendador nga kun ang warrant of arrest ma-expire ilaha kining iuli ngadto sa korte ug mangayo sila og ‘alias warrant of arrest,’ usa kini ka klase sa warrant of arrest nga walay expiry date.

Ang tulo ka nahisgutang police officials una nang mipahibalong gihimo nila ang tanan aron pagpangita kang Dumpit apan pulos napakyas ang maong tinguha, mismong si Nerez miawhag na kang Dumpit sa pagtahan sa iyang kaugalingon.

Si Dumpit gikasuhan tungod sa kamatayon sa robbery suspect nga si Ronron Go.

Lakip na si Cebu City Acting Mayor Michael Rama nga nagpakisusi sa kahimtang sa kontrobersyal nga polis nga si SPO1 Adonis Dumpit ug kung unsay gihimo karon sa kapulisan pagpangita sa ‘wanted’ nga polis.

Giklaro ni Rama nga siya wala nay kasayuran sa nahimutangan sa nahisgutang police officer sukad kini nabalhin og assignment gikan sa City Hall.

Una nang gipadayag sa acting mayor nga siya dili manghilabot sa kaso nga giatubang ni Dumpit paglikay nga dili masaypan sa publiko.

Gipaabot hinuon nga mopatim-aw ra si Dumpit sa iyang unit diha sa Regional Security Agencies and Guards Supervision Unit (RSAGSU-7) sa mosunod nga mga adlaw kun mapupos na ang gipangayo niining leave of absence sulod niining semanaha.- Elly Bolonos ug Lesley Caminade (BANAT NEWS)