Killer sa tigbalita gikonbikto

CEBU, Philippines - Gikombikto sa korte kagahapong adlawa ang akusado sa pagpatay sa usa ka tigbalita sa Pagadian niadtong Pebrero 2 tuig 2005 kansang kaso dinhi gi-hearing sa Sugbu.

Si RTC-7 Branch 6 Judge Ester Veloso mikombikto sa usa ka polis nga si Mohammad Maulana human mamatud-i nga sad-an ug maoy responsable sa pagpatay sa tigbalitang si Edgar Amoro.

Si Amoro usa usab ka magtutudlo sa Zamboanga del Sur National High School, ug part time nga magsusulat sa usa ka peryodiko sa maong dakbayan ug host sa usa ka Human Rights nga programa sa DXPR.

Si Judge Veloso mipahamtang og silot nga pagkabilanggo gikan sa 20 ka tuig hangtud sa 40 ka tuig ug pagbayad og P50 mil isip civil indemnity, P100 mil isip moral damages, P25 mil isip exemplary damages ug P20 mil isip temporary damages ngadto sa mga kabanay ni Amoro.

Si Judge Veloso nagkanayon diha sa iyang 19 ka pahinang desisyon nga dili makalumpag ang alibi sa akusado nga si Maulana sa “positive identification” sa tulo ka mga testigos sa prosecution nga gilangkoban sa asawa sa biktima nga si Erlinda Amoro, PO2 Desderio Pancho sa 905th Provincial Mobile Group ugSamuel Porsuelo usa ka barangay tanod.

Si Judge Veloso mihatag og gibug-aton sa testimonya ni Erlinda Amoro kinsa miingon nga nihunong ang iyang bana sa pagpanibya human gipusil patay ang co-anchor niining si Edgar Damalerio.

Matud pa ni Erlinda nga human makombikto angusa ka polis nga si Guillermo Wapile tungod sa pagtestigos sa iyang bana ug mao na usab kini og gisugdan og harass.

 Si Wapili gikombikto kaniadto ni Judge Ramon Codilla sa RTC-7 sa pagkabilanggo sa tibuok kinabuhi tungod sa pagpatay kang Damalerio niadtong Mayo 2002.

Tulo ka mga armadong lalaki ang mipusil patay kang Amoro niadtong Pebrero 2,2005 samtang kini nagsugat sa anak sa tunghaan. Laing testigo nga si Jury Lovitaño sa Damalerio murder ang gipatay usab niadtong Agosto 2002.

Tungod sa pagkapatay sa duha ang kapikas ni Damalerio nga si Gemma mipetisyon nga dinhi ibalhin sa Cebu ang hearing sa kaso.

 Sumala pa sa kapikas ni Amoro naabtan pa niyang nagtinga ang bana diha sa tunghaan tungod sa samad pinusilan ug kini nakalitok sa pangalang “Madix” nga mao si Maulana.

Samtang si PO2 Pancho mitumbok nga nagmotorsiklo siya paingon sa balay sa iyang kauban aron kuhaon ang iyang relief order apan iyang nakit-an ang pagpusil ni Maulana kang Amoro ug gani gipusil pa siya sa kauban niini nga nagsilbing look out ug nasamdan siya sa kamot.

Nakakita usab sa maong insidente angbarangay tanod nga si Samuel Porsuelo sanglit siya man ang nag-traffic sa eskuylahan niadtong higayuna dihang gipusil si Amoro sa atubangan sa Zamboanga del Sur National High School.

Hinuon ang mga abogado sa kombiktado mipadayag sa korte nga moduso sila og motion for reconsideration sa desisyon. - Chester Abadilla (BANAT NEWS)