CEBU, Philippines - Gidudahang masiao runner nasikop ug nakuhaan og 10 mil ka mga tip sheets sa kapolisan sa Criminal Investigation Branch (CIB) sa Mandaue City Police Office (MCPO) didto sa North Bus Terminal kagahapon sa kaadlawon.
Ang nasikop mao si Junel Catubay Quindao, 29, residente sa barangay Taytayan lungsod sa Bogo.
Matud pa ni Sr. Insp. Marvin Depaz ang hepe sa CIB - MCPO ug maoy mihimo sa maong operasyon nga dugay na nilang nasayran nga si Quindao runner sa maong illegal nga sugal nga naglihok sa norte.
Kagahapon sa kaadlawon samtang nagpahiluna si Quindao sa iyang gidalang 10 mil ka mga tip sheets sa usa ka bus miabot ang mga operatiba sa CIB ug kini gisikop ug gidala sa buhatan sa kapolisan.
Sa imbestigasyon ni Depaz ilang nasuta nga maghatdanan lang si Quindao sa maong mga tip sheets diha sa bus ngadto sa mga kalungsuran ug ihulog lang kini sa dapit nga adunay tawong maghulat sa usa ka gikasabutang lugar.
Hinuon gibutyag ni Quindao nga mimenus na ang operasyon sa masiao sa mga kalungsuran sa norte nga bahin sa Sugbu apan dunay pipila nga mopusta gihapon niini.
Si Quindao mag-atubang og kasong kalapasan sa PD 1602 pagkalambigit sa illegal nga sugal. (BANATNEWS)