CEBU, Philippines - Patay ang usa ka lalaki human kini matagak sa lawom nga pangpang samtang kini nagdagan paglikay sa tawong mitigbas kaniya diha sa barangay Cadulawan lungsod sa Minglanilla niadtong Domingo sa alas 6:00 sa gabii.
Ang biktima mao si Dionisio Belocura, 36, molupyo sa maong lugar, samtang ang suspek mao si Benjamen Rico Repdos, 44, ug nagpuyo gihapon sa maong dapit.
Matud pa ni SPO1 Romeo Barde sa Minglanilla Police dihang nahinabi sa Banat News, ang biktima kauban sa iyang mga barkada nga sila si Wennifredo Cellote ug Diolito Pantonia nanglakaw sa dalan paingon na untang mamauli.
Apan pag-abot sa maong lugar giatangan sila sa suspek nga kalit lang mipatin-aw dayun misukmag sa nawong ni Pantonia sa walay igong hinungdan, ang biktima pagkakita sa gihimo sa suspek mibadlong dayon sa naulahi.
Wala niini damhang masuko ang suspek ug kalit mibunot sa gitaking sundang ug gitigbas ang biktima makadaghang higayon diha sa dughan ug ubang parte sa lawas.
Bisan samaron nakahuna-huna pa og dagan ang biktima lakip na mga kaubanan pahilayo sa nagkadaiyang direksyon apan si Belocura wala makabantay nga ang direksyong iyang gidaganan dunay lawom nga pangpang sa daplin sa karsada.
Ang biktima nalahos og katagak ngadto sa gibana-banang kapin 50 ka tiil nga bung-aw ug didto motugpa sa batuon nga dapit hinungdan sa hinanali niining kamatayon.
Dali usab nga misibat ang suspek pahilayo sa dapit ug padayon pang gipangita sa kapulisan sa paghimo ning balita. Ang patay'ng lawas sa biktima naugkat sa mga mirespondeng kapulisan. Gikatahong gawas sa mga samad tinigbasan nangabali-bali usab ang kabukogan niini lakip na ang ulo.
Padayun pa ang hot pursuit operation sa kapulisan sa suspek nga pabilin pa karung gawasnon samtang gisusi pa usab kun unsay atraso sa kauban ni Belocura nga si Pantonia nganong gisukmag kini sa suspek. (BANATNEWS)