Nasakmita'g revolver nakaikyas

CEBU, Philippines - Usa ka lalaki ang nakuhaan og armas apan nakaikyas sa mga tanod human kini giingong nanion sa maong armas sa ilang silingan niadtong Sabado sa gabii diha sa sitio Pajo, barangay Linao, dakbayan sa Talisay.

Ang suspetsado mao si Alvin Chiong nga padayon pang gipangita sa mga polis apan gikatakdang pasakaan og kasong kalapasan sa Comelec gun ban karong adlawa (Lunes).

Nakuha sa tanod nga si Giovani Lasola ug sa residente sa lugar nga si Bombie Fernandez ang usa ka kalibre .22 nga revolver nga dunay tulo ka buhing bala gikan kang Chiong.

Ang giingong gitionan ni Chiong og pusil mao si Emerson Medado, 32, residente usab sa nahisgutang lugar.

Sa imbestigasyon sa kapolisan sa siyudad nga si Chiong mianha sa peryahan diha sa ilang lugar ug giingong nangita og away hinungdan nga nagkalalis sila ni Medado.

Taliwala sa panaglalis sa duha si Chiong mipauli sa ilang balay ug pagbalik pa niini nagbitbit na kini sa nahisgutang pusil ug gition ngadto kang Medado apan daling gibunlot ni Fernandez ang walang abaga sa suspetsado ug giilog ni Lasola ang pusil hinungdan nga mikaratel og dagan ang suspek. (Brenda Batuto)   (BANATNEWS)