CEBU, Philippines - Gumikan sa pagselos, gitangkugo pagpusil sa usa ka tawo ang karibal niyang barkada didto sa sitio Luray-I, barangay Poblacion, siyudad sa Toledo niadtong Domingo sa gabii.
Ang biktima mao si Arnel Cabiluna Tolentin, 22 , nga taga Sitio Sambag, barangay Magdugo, siyudad sa Toledo.
Samtang ang suspek mao si Ronald De Gracia alyas Nonon, hingkod ug walay pihong adres.
Si SPO3 Gil Lastimosa sa Toledo City Police Station mibutyag sa Banat News nga nahitabo ang pagpamusil samtang namauli na ang biktima ug ang suspetsado gikan sa ilang inom nga nagsakay og motorsiklo.
Apan pag-abot sa maong lugar, ang suspetsado nga nag-backride sa gimanihong motorsiklo sa biktima, milanit sa iyang armas de fuego ug gitangkugo pagpusil ang biktima.
Gikan sa tingkoy milapos ang bala sa liog sa biktima apan bisan og samaron nakapahunong pa kini sa iyang motor ug nakadagan pa kini dayung sakay og traysikad ug nagpahatud ngadto sa Toledo City District Hospital, apan tungod sa delikadong kahimtang gibalhin lang usab dayon kini sa tambalanan dinhi sa dakbayan sa Sugbo.
Samtang ang suspek nakasibat usab dayon ug mao karon ang gipangita sa kapolisan sa dakbayan sa Toledo. Selos ang motibo nga gisubay sa kapolisan kay may nadawat silang taho nga magkaribal ang biktima ug ang suspek sa usa ka babaye nga pulos nila gihigugma. (BANATNEWS)