Eddiegul supak nga ibutang sa watchlist sa PNP ang Talisay

CEBU, Philippines - Gisupak ni Kongresista Eduardo Gullas sa unang distrito sa probinsiya sa Sugbo ang migawas nga report nga nagpaubos sa dakbayan sa Talisay sa usa sa mga watchlist sa Cebu Provincial Police Office karong May 10, 2010 election.

Matud niini nga iyang supakon ug prostestahan kun ipaubos ang dakbayan sa Talisay sa susamang sitwasyon tungod sa giingong kawalay basehan niini. Matud pa niini nga dili kini makiangayon ug wala'y igong rason tungod kay wala'y mga nahitabong gubot sa siyudad sa mga milabay'ng eleksiyon.

Base sa taho nga ang gibasehan sa CPPO sa pagpaubos sa siyudad sa Talisay sa ilang watch list karong umaabot nga eleksiyon mao ang insidente niadtong 2001 election dihang ang grupo ni Gullas kinsa midagan sa pagka-mayor niadto sa siyudad gihulgang bombahan.

Si Gullas sa milabay'ng adlaw nagkanayon nga iyang gitawgan si CPPO director nga si Sr. Supt. Erson Digal aron kompirmahon ang maong taho apan matud sa Kongresista nga gihimakak kini ni Digal nga iyang gipaubos sa ilang watchlist ang Talisay. Ang Kongresista nagkanayon usab nga kinahanglang tangtangon sa CPPO sa ilang watchlist ang Talisay tungod kay sa maong sitwasyon makahatag kini og kahadlok sa mga investors.

Si Gullas midugang nga dihang midagan siya isip mayor sa Talisay wala'y mga nasigpatan nga mga armadong tawo.

Samtang ang kapolisan sa lungsod sa San Fernando nangandam na sa umaabot nga pangampaniya sa mga politiko tungod sa posibleng bangi nga mahitabo tali sa kampo sa administrasyon ug oposisyon.

Si Chief Inspector Canlapan, hepe sa San Fernando Police Station sa pakighinabi niini sa Banat News kagahapon nagkanayon nga niadtong election sa 2007, init kaayo ang politika sa San Fernando ilabi na nga 40 ka botos lang ang labaw sa incumbent mayor nga si Lakambini Reluya batok sa iyang kaatbang nga si Renee Canoy.

Matud ni Canlapan nga mohangyo siya nga mahilakip sa Election Watchlist Areas (EWA) ang San Fernando aron sa panahon sa election madugangan sila og polis nga magbantay sa pagmentenar sa kahapsay ug kalinaw sa maong lugar. – BANAT NEWS