Kapolisan sa probinsiya gimandoang dakpon si Dumpit kun masigpatan

CEBU, Philippines - Gimandoan sa kadagkuan sa kapolisan sa lalawigan ang tanang mga sakop sa pagdakop sa kontrobersyal nga polis nga si SPO1 Adonis Dumpit kinsa giingong nagtago-tago na human mogawas ang warrant of arrest niini sa kasong murder.

Si Sr. Supt. Erson Digal, director sa Cebu Provincial Police Office mibutyag sa mga sakop sa media nga duna nay kamandoang sikupon ang maong polis kun ilang masigpatan bisan asang dapita dinhi sa lalawigan.

Si Dumpit gipasakaan og reklamo diha sa Ombudsman for the Military sa mga kabanay sa biktimang si Ronron Go pipila na ka tuig ang nakalabay ug girekomendar nga ipasaka ang kaso ngadto sa korte.

Si Regional Trial Court branch 6 Judge Esther Veloso niadtong milabay’ng Biyernes mi-‘partially denied’ sa petisyon nga i-downgrade ang kaso ni Dumpit gikan sa murder ngadto na sa homicide.

Tungod sa rason nga wala pay gihatag nga mosyon ang Ombudsman nga amendahon ang impormasyon sa kaso. Si Dumpit gipasanginlang mituyo og pusil patay kang Go kinsa usa ka suspetsadong tulisan apan ang maong polis miinsister nga self-defense ang iyang gihimo.

Ang abogado ni Dumpit nga si Atty. Pedro Leslie Salva sa pakighinabi sa mga tigbalita sa mga nahaunang report miklarong wala magtago-tago ang iyang kliyente.

Ang prosekusyon moduso og mosyon ngadto sa korte nga ipatawag sa korte sila si Chief Supt. Lani-O Nerez, sa Police Regional Office (PRO-7); Sr. Supt. Patrocinio Comendador sa Cebu City Police Office, ug ang hepe ni Dumpit nga si Supt. Rex Derilo aron ipa-explain kun nganong hangtud karon wala nila kini madakpi.

Ang maong mga opisyal daan nang miklarong ilang gibuhat ang tanan pagpangita kang Dumpit ug wala nila kini tagoi o wala nila paabotang motahan kini sa iyang kaugalingon.

Giingong si Dumpit mipahibalong andam motahan sa iyang kaugalingon karong sunod semana.

Si Nerez nanawagan na kang Dumpit nga kini patahanon ug mipasalig nga buhaton nilang dili mabutang sa peligro ang kinabuhi niini.

Si Dumpit maoy usa sa mga aktibong polis dihang nadestino pa kini sa CCPO nga nakaingon sa pagkasikop sa mga notadong kriminal sa dakbayan hinungdan nga gikunsiderar karon ang nagpaabot nga peligro unya sa kinabuhi sa maong polis kun kini isagol sa mga kriminal nga iyang gipangdakop.   Guam Logroño)    (BANATNEWS)