Miting sa LP sa Talisay gi-postpon

CEBU, Philippines - Ang tigom sa Liberal Party (LP) sa dakbayan sa Talisay wala mahinayon kay si Senador Noynoy Aquino nga ilang presidentiable candidate dili makatambong.

Si kanhi Bokal Raul Bacaltos kinsa mikandidato karon sa pagka-mayor sa dakbayan sa Talisay kaatbang ni incumbent mayor Socrates Fernandez sa pakighinabi niini sa Banat News kagahapon nagkanayon nga alas 4:00 unta sa hapon kagahapon ang schedule sa ilang tapok-tapok diha sa sports complex sa barangay Tabunok, Talisay.

Ilang giimbitar si Noynoy nga motambong niini apan mibalibad ang senador tungod kay mitambong kini sa gipahigayong presidentiables’ forum sa Cebu International Convention Center (CICC) sa dakbayan sa Mandaue..

Si Bacaltos nagkanayon nga daan na silang nangandam niadto pang   milabay’ng semana apan gibalibaran sila sa senador gumikan sa kadaghang tambunganan niining tigom sa nagkalainlaing bahin sa nasud.

Matud ni Bacaltos nga gipasabot na lang niya ang ilang mga suporter nga maoktaba ang ilang tapok-tapok kay paabuton nila nga makahigayon gyud si senador Noynoy.

Si Bacaltos midugang nga ang Tabunok sports complex adunay kapasidad nga mokabat ngadto sa 2,000 ka tawo ug gituohan nilang mosugwak kini sa kadaghang tawo kun mahinayon ang ilang tapok-tapok uban ni Senador Noynoy Aquino.   (Brenda D. Batuto)   (BANATNEWS)