CEBU, Philippines - Walay kompiyansa ang Bando Osmeña Pundok Kauswagan (BOPK) sa umaabot nga eleksyon hinungdan nangita karon kini og suporta gikan sa religious sector. Gipahibalo ni Mayor Tomas Osmeña nga siya makigkita sa kadagkuan sa Iglesia ni Cristo (INC) dinhi sa Sugbu karong hapon kini aron kumbinsihon nga suportahan ang mga kandidato sa BOPK alang sa piniliay karong umaabot buwan sa Mayo. Ang liboan ka mga sakop sa INC gikataho nga mobotar lang sa mga kandidato nga imando sa ilang labaw nga maoy paluyuhan.Kini maoy gusto ni Osmeña nga makuha aron madugangan ang mga tigpaluyo sa BOPK nga iyang gipanguluhan sa taud-taod nang higayon.
Samtang itanyag usab sa mayor ang paghatag og lugar sa INC diha sa Don Sergio Osmeña Shrine sa barangay Kalunasan nga himuong sementeryo niini. Nasayran hinuon nga ang ikaatbang ni Osmeña pagka-kongresista sa habagatang distrito sa siyudad nga si Jonathan Guardo makapila na miduol sa INC.Giangkon ni Guardo nga sa miaging tuig, makaduha ka higayon nga siya miduol sa kadagkuan sa nahisgutang relihiyon aron sa pagpangayo sa suporta niini.
Gipadayag sa kandidato pagka-kongresista sa oposisyon sa south district nga dako og matabang ang boto sa INC alang sa umaabot nga eleksyon.
Wala pa hinuon makombinser ni Guardo ang INC nga mopaluyo sa iyang kandidatura ug sa iyang kaubang mga kandidato sa Kugi Uswag Sugbu (Kusug) party.Apan masaligon hinuon si Guardo nga maoy paluyohan sa INC tungod kay giingong ang mga molupyo sa dakbayan gusto og kausaban.
“Ila pa man gud na nga i-deliberate a week or two before the elections, naa man na sila'y mga criteria. I am confident nga kami maoy paluyuhan,” sumala ni Guardo.Gawas sa INC nagplano usab si Guardo pagduol sa ubang relihiyon alang sa pagpangayo usab sa suporta niini sa umaabot nga eleksyon. - Elly Bolonos (BANAT NEWS)