... maabot karong Biyernes

CEBU, Philippines - Ang Artsidyosesis sa Sugbo mipahigayon og Santos nga Misa alang sa kapahulayang dayon sa namatay nga Sugbuanong Press Secretary Cerge Remonde alas 6 ang takna sa hapon kagahapon didto sa Cebu Metropolitan Cathedral.

Ang mipasiugda sa Santos nga Misa mao sila si Msgr. Roberto Alesna, kura paruko sa Metropolitan Cathedral ug media liaison officer sa simbahan nga si Msgr. Achilles Dakay. Si Msgr. Dakay maoy general manager sa DyLA sa dihang misulod sa pagka-brodkaster si Remonde.

Sumala pa ni Paul Habahib, ang gitugyanan sa Malacañang sa Sugbu, si Mayor Tomas Osmeña ug kapikas nga si first lady Margot Osmeña mipahigayon usab og Santos nga Misa kagahapon sa alas 5:30 sa buntag sa Basilica del Santo Niño nga gipahinungod gihapon kang Remonde.

Matud pa ni Hubahib nga ang patay nga lawas ni Remonde moabot dinhi sa Sugbo ala 1 sa hapon karong Biyernes.

Gipaabot nga hayaon si Remonde anha sa Malacañang sa Sugbo sulod sa usa ka adlaw aron makasud-ong ug makahatag usab sa katapusang pagyukbo ang mga lokal nga mga opisyal ug lokal nga media ngadto sa namatay nga kalihim sa prensa.

Si Hubahib miingon nga sa pagka ala 1 sa hapon sa Sabado dad-on ang patay’ng lawas ni Remonde sa Argao, ang yutang natawhan sa kalihim, aron mahatagan usab og kahigayonan ang taga-Argao nga makabilar kang Remonde.

Dugang pa niini nga ang lubong sa mitaliwan nga kalihim ipahigayon sa pagka alas 3 sa hapon sa adlaw’ng Domingo ngadto sa sam-ang sa Argao. – BANAT NEWS