Mag-uuma suportahan

CEBU, Philippines - Ang pagpalambo sa abot sa kaumahan maoy labing gikinahanglan karon sa lalawigan sa Sugbo busa angayang buboan og hinabang sa kagamhanan ang mga mag-uuma, sumala ni Glenn Soco ang kandidato sa pagka-bise gobernador sa lalawigan.

Si Soco kauban ni Gobernador Gwen Garcia nga miduaw sa lungsod sa Carmen sa miaging adlaw ug didto iyang gipasalig sa mga mag-uuma ang pagtabang kanila aron labing molambo ang ilang panginabuhi sa panguma.

Nakita ug nasud-ong niya ang paningkamot sa mga mag-uuma sa pagtikad sa ilang yuta aron makapananom og mga pagkaon, sama sa lagutmon ug mga utanon.

Apan alang kaniya nga bisan unsaon og kayod sa mga

mag-uuma kun walay suporta sa gobyerno dili gihapon kini moasenso.

Busa alang kaniya ang programa sa lalawigan nga gitumong alang sa pag-ayuda ug pagsuporta sa mga mag-uuma labi kining palambuon sa kagamhanan alang-alang sa mga mag-uuma

Nasud-ong ni Soco ang dakong panginahanglan sa mga karsada tali sa kaumahan ug merkado, sakyanan nga mohakot sa mga abot sa kaumahan ug labaw sa tanan ang puhonan nga gikinahanglan kaayo sa mga mag-uuma.

Gawas niini gusto usab ni Soco nga magtukod og kooperatiba ang mga mag-uuma sa maong lungsod kay makatabang kaayo kini kanila og dako. Samtang si Gobernador Garcia usab miuyon sa mga plano ni Soco ug mipasabot sa katawhan sa lungsod nga angayan lang nilang suportahan ang iyang administrasyon karon, matud pa sa gobernador. - Pepe Sollano (BANAT NEWS)