Belleza wa mangampanya

 CEBU, Philippines - Si kanhi Bise Mayor Aberdove Belleza sa dakbayan sa Talisay gikatahong nangampaniya kuyog lang sa lima ka kandidato sa pagkakonsehal apan ang maong taho daling gihimakak sa iyang kaalyado nga si Ricky Tabay.

Si Tabay kinsa nahinabi sa Banat News kagahapon nagkanayon nga niining bag-o lang sa gipahigayon nilang miting, ang tanang mga kandidato sa oposisyon gawas kang kapitan Arnulfo Dela Torre sa barangay Cansojong kinsa midagan sa pagka-konsehal sa siyudad mao ray wala motambong.

Gikataho usab nga ang mga kapitan nga misuporta kang Belleza, wala modala sa kaubanan nila sa oposisyon karon.

Apan matud ni Tabay nga ang ilang kandidato sa pagka-mayor nga si Raul Bacaltos nakahibawo na sa maong sistema ug dili nila mapugos ang mga kapitan ilabi na kadtong dili makabiya kang Kongresista Eduardo Gullas.

Si Tabay mihimakak sa mga huhongihong batok kang Belleza ug gipasalig niya nga magkahiusa sila sa kusog ug gahum ug mao kini ilang ipakita ngadto sa katawhan.

Apan sa pagkakaron gitugotan sila ni Bacaltos nga matag usa kanila ang makig-ila-ila ngadto sa mga tawo.

Si Tabay kinsa maoy kanhi Sangguniang Kabataan Chairman sa barangay Poblacion niadtong 1992 hangtud 1997, napili usab nga konsehal sa barangay Poblacion gikan sa 2002 hangtud 2007.

Niadtong tuig 2007 midagan si Tabay isip kapitan sa barangay Poblacion apan napildi siya sa kapitan karon nga si Teodoro Belleza. - Brenda D. Batuto (BANAT NEWS)