P12 milyones nga pundo sa taytayan ipagawas

CEBU, Philippines - Gitinguha karon sa kadagkoan sa Department of Public Works and Highways (DPWH) 7 ang pagpagawas og P12 milyones nga pundo alang sa maintenance sa Marcelo Fernan Bridge.

Si Engr. Mario Montejo sa First Engineering District sa DPWH mipadayag niini dihang nahinabi sa mga tigbalita atol sa binuwan nga miting sa Mactan Cebu Bridge Management Board (MCBMB) sa miaging adlaw.

Matud pa niya nga gikinahanglan kaayo nga ikapagawas na ang maong gahin alang sa maong taytayan nga nagdugtong sa dakbayan sa Mandaue ug dakbayan sa Lapulapu .

Gipasabot ni Montejo nga gipaningkamutan karon sa ilang buhatan nga ang nasinati sa 1st Mactan Mandaue Bridge nga gitak-opan dihang gihimo nila ang pagritoki niini, nga dili na masinatian sa ikaduhang taytayan.

Gitataw ni Montejo nga dako kaayo og epekto sa dagan sa negosyo sa Metro Cebu area sa higayon nga tak-opan ang ikaduhang taytayan o Marcelo Fernan Bridge alang sa maintenance nga pagahimoon.

Kini ang nag-unang hinungdan nga gipaningkamutan sa ilang buhatan ang makanunayon nga pag-atiman sa maong taytayan alang sa paghatag pa niini og dugang kalig-on, matud niya. - Romeo T. Limpangog (BANAT NEWS)