CEBU, Philippines - Mga polis sa Mambaling police station nga mitubag sa alarma gipamusil apan sakyanan lang nila ang naigo diha sa sitio Abya sa barangay Alaska-Mambaling kagahapon sa kaadlawon.
Ang miscellaneous team sa Mambaling Police Station pinanguluhan ni SPO1 Joseph Toring nakadawat og tawag sa telepono nga may pagpamusil nga nahitabo sa maong dapit hinungdan nga ila kining gisusi.
Naabtan nila ang tulo ka lalaking nagsul-ob og bonnet ug jacket apan daling nanagan ug kalit lang nagpabuto og armas kanila, gisuwayan og gukod ang tulo apan napakyas.
Nakuha sa kapolisan diha sa crime scene ang paltik nga .38 rebolber nga may unom ka buhing bala, upat ka kabhang sa .9mm caliber pistol, duha ka kabhang sa kalibre .45 ug tulo ka pares sa tsinelas nga gituohan nga gipanag-iya sa tulo ka lalaki nga namusil sa kapolisan. – BANAT NEWS