Koreano nakuhaag shabu

CEBU, Philippines - Usa ka Koreano ug laing usa ang nasakmitan og 32 ka paketeng gidudahang shabu sa duha ka operasyon sa kapolisan kagahapon sa kaadlawon.

Ang Koreano nailhan nga si Kim Se Woong, 38, nagpuyo sa barangay Langub, dakbayan sa Lapulapu, samtang ang lokal nga giingong pusher mao si Alberto Paro, 27, taga sitio Lawis, barangay Pasil, dakbayan sa Sugbo.

Si Woong nasakmitan og 22 ka paketeng shabu, ug lima ka tinfoils samtang si Paro nakuhaan og 10 ka paketeng shabu.

Si SPO1 Francisco Balansag sa Traffic Group sa Mandaue ug PO1 Romeo Jumalon sa Police Regional Office (PRO) 7 nagkanayon usa ka Danil Kwen, 46, nga nagpuyo sa usa ka hotel sa Nivel Hills, sa barangay Lahug maoy naggiya kanila pagsikop kang Woong.

Si Kwen mireklamo batok kang Woong, apan wala makahatag og detalye ang kapolisan kabahin sa pagkasikop niini.

Samtang si Paro nadakpan usab sa mga sakop sa Investigation and Detective Management Branch(IDMB) misuroy ngadto sa Pasil dihang nasigpatan sa mga polis tungod sa kadudahan niining lihok.

Ang suspetsado dihang girekisa nakuhaan og 10 ka paketeng may sulod nga gidudahang shabu. – BANAT NEWS