Personal ug dili politika ang motibo

CEBU, Philippines - Nailhan na sa kapulisan ang suspetsadong mipusil patay kang Prostito Batiancela, 56, nga suporter sa pamilyang Martinez sa 4th district sa lalawigan sa Sugbu nga gipatay niadtong Domingo sa gabii sa sitio Tingtingon, barangay Maricaban Sta. Fe.

 Si Sr. Supt. Erson Digal, ang director sa kapulisan lalawigan sa Sugbu nagkanayon nga nailhan na nila ang namusil sa biktima ug silingan ra niya kini ug wala pa makabiya sa ilang lugar.

Matud pa niini nga ila nalang gipaabot nga mahuman ang affidavit sa ilang tulo ka mga nakuhang testigos aron na sa pagsikop sa akusado ingon man pagpasaka’g kaso batok niini.Giklaro niining personal grudge ang maong krimen ug wala gyu’y kalambigitan ang politika sanglit gikatahong managkaaway na ang duha kaniadto pa.

Gibutyag niining gitawgan usab siya ni Kongresista Benhur Salimbangon sa 4th district sa lalawigan sa Sugbu nga ipadali ang pagpahigayon sa pag-imbestigar sa kaso aron mataral ang suspetsado sanglit gilambigit na usab ang iyang pangalan sa maong krimen sa iyang mga kaatbang sa politika.

Ang namatay kawani sa munisipyo sa maong lungsod ug nailang leader sa mga political supporters ni Mayor Jennifer Illustrisimo nga kaalyado sa mga Martinez. – BANAT NEWS