Czech national naghikog gyud - Soledad

CEBU, Philippines - Gisirhan na sa kapolisan sa lungsod sa Barili ang ilang imbestigasyon kalabot sa Czech national niadtong Lunes sa barangay Cabcaban nga nang-hostage og duha ka mga dalaga ug nagdaob sa kaugalingon ingon man sa balay.

 Ang hepe sa Barili Police Station Chief Insp. Alexander Soledad nga gikahinabi sa DySS nagkanayon nga sulbad na ang kaso ni Miloslav Frolisek, 52, ug nasutang personal nga problema maoy motibo sa iyang gibuhat.

Gikumpirmar usab ni kapitan Flaviano Empuerto sa nahisgutang lugar nga bayolente gyud si Frolisek nga giingong gibuwagan sa iyang pangasaw-unong anak sa usa ka barangay tanod nga nilarga na sa kauluhan.

Sumala pa niini nga walay foul-play nga nahitabo kun dili suicide gyud kini sanglit dihang nagkaduol ang iyang mga sakop sa area aron sa pag-responde gidauban na niini ang panimalay dihang nakabantay kining dunay mga police nga nangabot.

Matud pa niini nga dihang gipahigayon sa iyang mga sakop ang negosasyon, nisamot pagkabayolente si Frolisek pinaagi sa pagpasalba sa iyang armas ug nagpusil sa iyang kaugalingon.

“Paspas kaayo ang panghitabo, nag-wild na’g maayo didto sa sulod sa balay nga nisilaob nga hinungdan nga nagpadali sila’g tawag og bombero, naglisod usab sila pag-communicate niini sanglit lahi ang sinulti-an, hinungdan nga wala na gayo’y mahimo ang mga police nalitson gyud kini dihang naugdaw ang balay ug dili mailhan human mapaig,” sumala pa ni Soledad.

 Gibutyag niini nga kapin na sa tuig si Frolisek nga nagpuyo diha sa barangay Talo-ot human nakapalit og yuta ug balay, apan sa ilang nahibaw-an nakapalit usab kinig yuta nga gibutang sa pangalan sa iyang sinaligan nga si Irene Fajardo.

 Hinuon wala hilabti niini ang duha ka mga dalaga nga sila si Igeane Fajardo ug Marisa Hernandez, kinsa gibuhian ni Frolisek niadtong Lunes sa alas-3 sa kaadlawon human iyang gi-hostage dihang nakasulod kini sa panimalay ni Irene Fajardo niadtong Domingo sa hapon. – BANAT NEWS