CEBU, Philippines - Duha ka mga drug pusher sa dakbayan sa Mandaue napaslak karon sa prisohan human kini hidakpi sa kapolisan didto sa Sitio Bilduhan, Brgy. Omapad dakbayan sa Mandaue sa miaging hapon.
Ang mga suspetsado mao sila si Leonilo Companero, 34, ulitawo, nga taga Sitio Pilapil Brgy. Omapad sa maong dakbayan, ug Annabelle Alilin, 38, dalaga, nga silingan ni Companero.
Matud pa ni P/SInsp. Alfredo Ortiz Jr., hepe sa Station 5 sa Mandaue City Police Office (MCPO) nga maoy nangulo sa buybust operation, nga dugay na nilang gipanid-an ang maong mga suspek.
Matud pa niya nga anaa na kini sa ilang watchlist sa mga notadong drug pusher sa maong dapit.
Atol sa buybust operation, diin si Companero maoy tumong niini, nasakmitan siya og duha ka gagmay’ng pakete sa gituohang shabu ug ang mark money nga balor og P200.
Sa maong operasyon si Alilin nga naatol nga diha sa maong operasyon, kansang lihok makapaduda kaayo, girekisa usab kini sa usa ka policewoman ug didto nakuha ang walo ka gagmay’ng pakete sa gituohang shabu gikan sa iyang bulsa uban sa mga kahimanan sa paghingos niini.
Si Companero ug Alilin gidetener na karon sa prisohan sa Station 5 samtang giandam pa ang mga kasong ipasaka batok kanila. - Bong Soriano ug Romeo T. Limpangog (BANAT NEWS)