CEBU, Philippines - Maayong edukasyon maoy unang atimanon ni senatorial aspirant Neric Acosta uban sa tinguhang matag pamilya duna gyu'y bisag usa ka miyembro nga makatapos sa kolehiyo.
Si Acosta nga mibisita sa buhatan sa The Freeman ug Banat News kagahapon dihang gikahinabi sa Banat News nagkanayon nga himuon niyang adbokasiya ang edukasyon alang sa kabataan.
Lakip sa buot nga matutukan ni Acosta mao ang kalidad sa mga magtutudlo nga alang kaniya kinahanglang palambuon aron mas molig-on pa ang ilang pundasyon sa kinaadman pagtudlo.
Si Acosta kanhi magtutudlo sa wala pa mosulod sa politika ug karon nasakop na sa Liberal Party.
Gawas sa edukasyon, duna say mga plano si Acosta kabahin sa pagpanalipod sa kinaiyahan diin naglangkob sa pagprotehir sa kalasangan, kadagatan ug ensaktong pamaagi sa paghipos sa mga basura.
Sumala pa niini nga kinahanglang dunay halapad nga kampanya pagpasabot sa publiko kabahin sa sitwasyon karon sa kalikupan.
Samtang sa kahapsay ug kalinaw ilabi na sa Mindanao, si Acosta nagkanayon nga dako kining hagit alang sa tanan sanglit daghan nang nanglabay nga administrasyon ang wala makasulbad niini.
Sumala pa niya nga kinahanglang patas ang pagtagad sa administrasyon sa taga Mindanao ug dili niadto lang mga pinili nga karon duna nay mga kaugalingong private armies. Si Acosta nahimong kongresista sa Bukidnon sulod sa tulo ka termino, bise presidente sa Mindanao Liberal Party.
Usa siya sa mga nangusog sa pagduso sa Clean Air Act, Clean Water ug Solid Waste Management Act. (BANATNEWS)