Naunay sa airgun kritikal

CEBU, Philippines - Kritikal ang kahimtang sa 41 anyos nga lalaki human kini naunay dihang nabuthan sa iyang kaugalingong .22 kalibre nga air gun sa iyang agtang samtang naglimpyo niini diha sa iyang pinuy-anan sa barangay Corazon lungsod sa Catmon niadtong Domingo sa ala 1:15 sa hapon.

Ang biktima sa kaugalingon niyang armas mao si Arbee Monterola, 41, molupyo sa nahisgutang lugar.

Matud pa ni PO2 Ronald Wahing sa Catmon Police dihang nahinabi sa Banat News gi-dismantle niini ang iyang .22 caliber air gun human kini mokagar kay mi-stack up ang bala inig pabuto.

Apan dihang gibungkag na ang maong armas ug gilimpyohan aksidente kining mibuto atol pa gyud sa iyang paglili sa sumbohan hinungdan sa pagkaigo sa agtang sa biktima.

Daling gihatod sa mga kabanay si Monterola sa Juan Dosado Memorial Hospital apan tungod sa ka talandugon nga kahimtang gilahos dayun kini sa Vicente Sotto Memorial Medical Center (VSMMC). (Darrel Carumba)   (BANATNEWS)