P7.6 Bilyones nga target dako na
CEBU, Philippines - Mokabat sa P7.6 bilyones ang target nga kolektahunon sa Bureau of Customs Port of Cebu ning tuig 2010 nga mas taas og P2 bilyones ikumparar sa miaging tuig hinungdan nga gidak-an ra ang bag-ong natudlong pangulo sa adwana dinhi.
Si Cebu Customs District Collector Ronnie Silvestre sa dihang nahinabi sa Banat News nagkanayon nga nakugang siya sa gihatag nga collection target sa port of Cebu ni BOC Commissioner Napoleon Morales nga mokabat ngadto sa 35 porsiyentong pagtaas.
Ang kinatibuk-ang target sa BOC lukop nasud ning tuiga mokabat P278 bilyones kung itandi sa milabay’ng tuig P276 bilyones ra.
Gumikan niini, si Silvestre mipadangat og suwat hangyo ngadto ni Morales ug ni Finance Secretary Margarito Teves nga paubsan ang ilang gihatag nga target collection sa Cebu.
Mipadayag si Silvestre nga wala kini magpasabot nga ilang gisupak ang maong kamanduan, apan ensakto na kanila ang P6.6 bilyones nga target collection karong tuiga.
Nagduda si Silvestre ang naghinobrang P800 milyones kapin ka pesos nga target collection sa Cebu sa milabay’ng tuig maoy nakaingon niini . (Bong Soriano) (BANATNEWS)
- Latest
- Trending
