2 ka drayber nangaangol kay nagdasmagay ilang sakyanan

CEBU, Philippines - Naka-angkon og grabe nga kadaot sa lawas ang duha ka tawo human magbinanggaay ang gimaneho nilang tricycle ug motorsiklo didto sa dakbayan sa Danao sa miaging gabii.

Ang mga biktima mao sila si Joel Tagalog, hingkod, nga taga barangay Binongcalan, lungsod sa Catmon, ug Cepriano Matiga Jr. hingkod nga taga sitio Camalig Bato, barangay Taboc, dakbayan sa Danao. 

Si SPO1 Reynante Manulat sa Danao City Police Station mibutyag sa Banat News nga si Tagalog maoy nagmaneho sa motorsiklo, samtang si Matiga mao usa'y nagdala sa tricycle.

Base sa pasiunang imbistigasyon sa kapolisan nasayran nga ang motorsiklo nagpaingon na unta sa habagatang bahin dihang ang kasugat niining tricycle kalit lang mituyok hinungdan nga nagbinanggaay ang duha.

Tungod sa kakusog sa pagkabangga natagak si Tagalog sa motorsiklo nga iyang gimaneho, samtang nalamba usab sa karsada si Matiga uban sa iyang tricycle.

 Nabalian sa walang tiil si Tagalog, samtang giingong nabungi usab si Matiga.

Daling gidala sa Danao District Hospital ang duha apan gibalhin usab dayon sila ngadto sa Vicente Sotto Memorial Medical Center sa dakbayan sa Sugbo. – BANAT NEWS