Drug pusher nadakpan sa Santander

CEBU, Philippines - Usa ka suspetsadong pusher og shabu nagtingkagol karon sa prisohan sa Santander Police Station human kini masakmiti og usa ka dakong plastik nga paketeng shabu sa gipahigayong checkpoint sa kapolisan sa maong lungsod didto sa atubangan sa ilang municipal hall sa miaging gabii.

Ang suspetsado nailhan nga si Narmiel Mabaquiao, 25, ulitawo, walay trabaho, nga lumad nga taga Poblacion Bindoy, Negros Oriental.

Ang team sa kapolisan nga nakadakop sa suspetsado gipangulohan ni Inspector Abdell Laborte, nga maoy hepe sa Santander Police Station.

Gawas sa drugas, gilakip pagsakmit sa kapolisan ang P120 nga kwarta sa suspetsado nga gituohang halin sa ginadiling drugas.

Si PO2 Clyde Benjamin Yu sa Cebu Provincial Police Office Operation Branch mibutyag sa Banat News, nga base sa ilang nadawat nga report gikan sa Santander Police Station si Mabaquiao nagsakay sa Ceres Bus nga adunay body number 8220 gikan sa dakbayan sa Sugbo ug paingon unta kini ngadto sa pantalan sa Bato, Samboan aron motabok ngadto sa Negros Oriental.

 Apan nataymingan niini ang check point nga gihimo sa kapolisan sa Santander diin matag usa ka pasahero gipakanaog sa sakyanan uban sa paghiling sa ilang dalang mga butang.

Didto wala makaikyas ang suspetsado dihang sa pagsusi sa iyang bag didto ang dakong pakete sa plastik nga gisudlan sa shabu, busa gipugngan dayon siya sa kapolisan.

Ang nasakmit nga drugas gidala dayon ngadto sa crime laboratory sa Cebu City Police Office para sa eksaminasyon. – BANAT NEWS