Mas daghan ang deboto

CEBU, Philippines - Mas daghan ang mga debotong temporaryong mipuyo diha sa devotee city nga giandam sa dakbayan kumparar sa milabay'ng tuig   matud ni Raquel Vallente, administration officer sa buhatan ni Konsehal Edwin Jagmoc sa dakbayan sa Sugbo.

Si Vallente mibutyag sa Banat News nga sa milabay'ng tuig 1,990 lang ang gidaghanon sa miokupar diha sa devotee city lakip na niini ang mga bata.

Kumparar sa milabay'ng tuig, 72 ka 20-footer vans, 14 tents, ug gipapuy-an lang og di molapas sa 20 ka tawo, apan niining tuiga 72 ka mga 20-footer vans, 12 ka 10-footer vans ug 14 ka tents ang nagamit alang sa mga deboto nga miabot sa 2,900 lakip na mga bata.

Matud usab ni Vallente nga niining tuiga matag van 34 ka mga tawo ang moukupar niini.

Si Rosalina Amowing, 39-anyos, minyo, taga dakbayan sa Bogo kinsa usa sa mga deboto mibutyag nga matag pista ni Senyor Santo Niño moanhi gyud sila sa Sugbo tungod kay ilaha na kining gipanaad.

Si Amowing ang nagdala sa lima sa unom niya ka mga anak diin makita nga bisan unsa kalisod sa pagbiyahe paingon nganhi sa Sugbo wala niya kini panumbalinga matuman lang ang iyang saad ngadto sa Santo Niño aron makapasalamat sa tanang mga grasya nga ilang nadawat sa matag adlaw.

Kabahin sa kahapsay ug kalinaw sa lugar si SPO4 Leo Inso sa Cebu City Police Office kinsa maoy team leader sa kapolisan nga gidestino diha sa devotee city kini nagkanayon nga higpit ang seguridad sa dapit tungod kay walay bisan kinsang makasulod gawas niadtong dunay mga identification cards nga giisyu sa dakbayan.

Si Inso midugang nga niadtong Biyernes nangabot ang mga debotos ug karong buntag niining adlawa (Lunes) papahawaon na sila sa lugar. – BANAT NEWS