Guardo ikiha'g libel ni Tomas

CEBU, Philippines -  Pasakaan na og kihang libelo sa kagamhanan sa dakbayan sa Sugbu ang negosyanteng si Jonathan Guardo kinsa magpapili usab sa pagka-kongresista sa habagatang distrito sa siyudad atbang ni Mayor Tomas Osmeña.

Kini tungod kay ang City Legal Office nakakita na og basihanan sa pagpasaka og kaso kaniya.Matud ni City Attorney Joseph Bernaldez nga may gi-draft na silang sumbong ngadto sa korte nga ilang iduso karong sunod semana.

Ang kasong libel nahuna-hunaan ni Osmeña nga ipasaka batok kang Guardo tungod sa pasangil nga giluwatan sa maong magpapatigayon batok sa kagamhanan sa dakbayan.Kini sa dihang nanghatag si Guardo ug relief goods ngadto sa mga biktima sa sunog diha sa barangay Calamba niadtong miaging Sabado.

Gibutyag ni Guardo nga gisuwayan kuno sa pagpugong sa barangay ang ilang mga hinabang pinaagi sa mando sa City Hall nga maoy gikalagutan ni Osmeña.Kini tungod kay giingong wala’y kalibutan ang mayor sa pagpang-apud-apod ni Guardo og pinutos nga pagkaon ngadto sa mga biktima sa sunog.

Gitataw ni Osmeña nga wala’y basihanan ang maong pasangil ni Guardo uban sa paghulagway niini nga usa ka malisyusong akusasyon.

Daan nang gipadayag sa mayor nga dili niya igsapayan kung ang iyang pagkatawo maoy dauton ni Guardo nga higpit niyang kaatbang sa unang distrito.Apan ang pagduhig sa iyang pagka-mayor ug sa mga konsehal sa siyudad maoy butang nga dili niya mapasaylo.

Hinuon si Guardo nga nasayod sa bahad ni Osmeña nagkanayon nga wala siya mahadlok sa maong kiha kay andam niya kining atubangon sa hukmanan.

Gipasabot sa magpapatigayon nga ang iyang giluwatang pamahayag gibasi lang usab sa gisulti sa iyang leader nga si Cora Lim.

Si Lim gikatahong maoy giduol sa mga barangay tanod sa Calamba ug misanta kaniya nga dili ihinayon ang pagpanghatag og pagkaon sa mga nabiktima sa sunog.

Ang mga tanod giingong ubos sa pagmando sa ilang barangay kapitan nga si Victor Quijano Jr. nga matud pa gisugo usab sa City Hall.

Nagtoo si Guardo nga wala mamakak si Lim ug kini wala’y intensyon usab nga mutumo-tumo og taho ngadto kaniya. Apan nasayran nga si Lim kinsa usa usab ka kanhi konsehal sa Calamba dili na moangkon nga mga barangay tanod ang mipasidaan kaniya.    BANATNEWS)