Multicab nahagbong apan drayber nahanaw

CEBU, Philippines - Usa ka kolor puting multicab ang nalimbuwad ug nahagbong sa taytayan sa barangay Baclayan lungsod sa Boljoon sa miaging adlaw apan ang nagmaneho sa maong sakyanan giingong nahanaw.

Base sa taho nga nadangat sa Operations Branch sa Cebu Provincial Police Office (CPPO) usa ka tawo ang misulti sa kapolisan nga dunay usa ka multicab nga nagdala sa plate number JCW-866 ang natagak sa taytayan nga may unom ka metro ang gilawmon niini.

Sumala pa sa maong taho nga gituohang gikan sa dakbayan sa Sugbo ug padulong sa habagatang bahin sa Sugbo dihang nakasugat kini og aksidente.

Matud pa nga samtang ang maong sakyanan naabot sa lugar nga nahitaboan ang nagmaneho nawad-an og kontrol samtang nagdulhog sa kurbadahong dalan ug nabangga sa railings dayong katagak sa ubos nga bahin.

Sumala pa sa maong taho ang insidente gibana-bana nga nahitabo sa alas 10:30 ngadto sa alas 11:30 sa gabii.

Sumala pa ni SPO2 Roderick Roma nga nahinabi sa Banat News nga posibleng kinawat ang maong sakyanan ug gituyo kini sa paghagbong. Wala sab sila’y nakit-ang mga timailhang dunay patay o naangol sulod sa sakyanan. (Bryner Diaz, UV Journalism Intern)   BANATNEWS)