Mga 'kawatan' taga Bacolod naaktuhan diha sa mall nadakpan

CEBU, Philippines - Lima ka dayo nga gipasanginlang kawatan gikan sa Bacolod ang nasikop sa mga gwardiya sa Ayala Mall human gikatahong misuway og kawat sa usa ka bag nga gipanag-iya sa usa ka babayeng kustomer.

Ang nasikop nailhan nga sila Jerame Magtubo, 26, Merlyn Parenio, 44, Roldan Brodit, 45, Christopher Perez, 29 ug Aaron Panisa, 27, pulos taga Bacolod City.

Samtang ang ilang nabiktima nailhan nga si Ederlina Anderson, 56, molupyo sa Vista Grande, Bulacao dakbayan sa Talisay kinsa nakuhaan sa iyang shoulder bag nga dunay sulod nga P5 mil, 200 dolyares ug Gucci sunglasses ug pepper spray.

Nasayran nga sa miaging hapon pasado ala una naniudto ang biktima uban sa iyang bana diha sa usa ka restaurant sa sulod sa maong mall, usa ka waitress ang miduol kaniya ug nangutana kun duna bay butang niining nawagtang.

Ang ginang daling misubay sa iyang mga gidalang butang diha sa lamesa ug nakugang nalang kining wala na ang iyang gisablay nga bag diha sa kilid hinungdan nga dali nilang gipahibalo ang mga gwardiya.

Ang gwardiya nga si William Jusoy daling migukod nila ni Magtubo, Parenio ug Brodit nga gihulagway nilang kadudahan gyud ang linihukan apan nakamatikod ang tulo ug daling mipaspas sa ilang paglakaw pagawas sa mall.

Dihang gidala ang tulo diha sa Theft and Robbery Section nabasahan diha sa ilang mga cellphone ang lokasyon sa duha pa nila ka kauban nga naghisgot nga mag-abot lang sila sa usa ka pension house sa dalan Manalili.

Tungod sa maong impormasyon, alas-3 sa kaadlawon kagahapon gisusi sa mga operatiba sa TRS ang nahisgutang pension house ug diha nila masikop sila si Perez ug Panisa.

Sa pakighinabi sa mga tigbalita sa hepe sa TRS nga si Sen. Insp. Michael Anthony Bastes kini nagkanayon nga adunay daghang modus ang grupo aron sa pagkuha lang sa atensyon sa biktima ug aron makuha ang ilang buot kawaton.

Kini sama sa paghulog og sensilyo ug uban pa nga makaingon nga malipat ang biktimahunon, kini ilabi na diha sa mga kan-anan sanglit sagad anha moadto ang mga langyaw ug uban pang mga turista.

Si Anderson sa iyang bahin mipadayag nga interesado siyang mopasaka og kaso batok sa lima. Ang lima gisuwayan pagkuha og habig apan nagdumili sila pagtingog kabahin sa alegasyon. – BANAT NEWS