CEBU, Philippines - Nanganti ang kadagkuan sa Sinulog Foundation nga dakpon ug ipa-priso ang si bisan kinsang masakpang magpalusot og fake tickets atol sa Sinulog Mardi Gras karong Domingo diha sa Cebu City Sports Center.
Mao kini gipahibawo ni Ricky Ballesteros ang executive director sa Sinulog Foundation dihang nahinabi sa Banat News aron usab madisiplina ug mapakgang ang mga tighimo niini.
Giangkon ni Ballesteros nga dili gyud kalikayang adunay mga gipalusot nga fake tickets sa nanglabay'ng Sinulog.
Giklaro ni Ballesteros nga kadtong masakpan ilaha gyud kining dakpon ug ipapriso aron magmatngon ug madisiplina na ang pagamit og fake tickets.
Hinuon gipahibawo ni Ballesteros nga sukad pa sa Huwebes sa milabay'ng gabii ‘sold out’ na ang tanang tickets sa Sinulog Mardi Gras gikan sa tag P600 nga kolor puti, yellow nga tag P500 ug pink nga tag P400.
Samtang gipahibalo ni Ballesteros nga ang buhatan ni Bise Mayor Michael Rama maoy in-charge sa pagpang-isyu sa mga tickets sa mga VIP's ingon man sa mga tickets alang sa mga sakop sa media nga mo-cover sa kalihukan. – BANAT NEWS