CEBU, Philippines - Giklaro sa abogadong environmentalista nga si Benjamin Cabrido nga sayop ang pagtuo ni Gobernador Gwendolyn Garcia nga mosaway silang mga sakop sa Global Legal Action on Climate Change sa mga proyekto sa kagamhanan sa probinsiya nga walay research.
Matud pa ni Cabrido nga dili na kinahanglan nga sultihan sila nga mag-research una pa manaway sa gobernadora kay hagbay na silang nagpahigayon og research ug nasayod usab sila sa mga programa sa Kapitolyo.
Si Cabrido miingon nga ilang gisuportahan ang P1 milyon nga programa sa gobernadora nga pagpananom og kahoy upat na ka tuig ang nakalabay pinaagi sa pagpahigayon og tree planting matag semester uban sa iyang mga tinun-an sa USJ-R.
Gani gipahibalo sa abogado ang gobernadora nga mitubo na pag-ayo ang ilang gitanom matag tuig apil na ang mga mangrove sa daplin sa dagat.
"Na reflect man dinha ang among gipangtanom....siya (Garcia) wa gyud na siya mitanom og bisan usa ka buok nga mangrove," matud pa ni Cabrido.
Hinuon si Cabrido miuyon nga ang pagsayaw sa gobernadora sa Sinulog usa ka matang sa pagpangaliyupo aron kaprotihean ang Sugbo gikan sa katalagman.
Apan gitataw niini nga ang gihimo ni Garcia dili gihapon mosaler tungod kay wala kini motabang nga kapugngan ang katalagman nga manghitabo.
"Pero bisan og mangaliyupo ka og kadaghan, apan ikaw wala mobuhat aron mapugngan ang katalagman, we know for the fact nga ang gi-sponsor ug gi-host sa gobernadora nga coal fire power plant (maoy) number 1 contributor sa pagguba sa kalikupan, wa gihapon kini epekto," dugang pa niini.
Ang abogado miingon nga kun ipadayon sa gobernadora ang pagsuporta sa Korean Electric Power Corp. (KEPCO) nga maggamit og coal, ang coal ash niini walay duhaduha nga makadulot og katalagman.
"Kay ang klema dili man madala og negosasyon, ang nature di man madala og negotiation bisan unsaon nimo og sayaw-sayaw diha, mobawos gyud ang kinaiyahan kun unsay imong buhaton," dugang pa ni Cabrido. - Chester Abadilla (BANAT NEWS)