CEBU, Philippines - Gipadayag ni Kongresista Benhur Salimbangon sa ikaupat nga distrito sa lalawigan sa Sugbu nga iyaha nang gidawat ang desisyon sa labaw'ng hukmanan nga nagdeklarar sa iyang kaatbang nga si Celestino “Tining” Martinez III nga maoy tinud-anay nga midaog sa pagka Kongresista sa ikaupat nga distrito sa lalawigan sa milabay’ng 2007 eleksyon.Si Salimbangon sa gipatawag niini nga press conference kagahapon nagkanayon nga nakasang-at na sila og Motion for Reconsideration niadtong Miyerkules didto sa Korte Suprema.Matud sa Kongresista nga gusto lamang niya mahatagan og katin-awan sa maong desisyon sanglit ang House Representative Electoral Tribunal (HRET) nagtuki lang sa 300 ka stray votes kang Martinez apan nahibulong siya sa dihang giukay-ukay kini miabot naman hinuon ang labaw ni Tining og dul-an 5 mil botos nga maoy gibasehan sa desisyon sa Korte Suprema.
Gitataw ni Salimbangon sa ilang gidusong MR ngadto sa Korte Suprema kinahanglang ukayon pagbalik ang kopya sa HRET ug C-CEMPIL nga maoy angayang sutaon sa Korte Suprema.Iyang gidugang nga bisan og tipu-tipuon pa ang stray votes ni Tining siya gihapon ang midaog tungod sa kadako sa iyang labaw niadtong miaging piniliay.Apan alang kang Salimbangon dili siya mabalaka niini sanglit taas pa kaayo ang proseso.
“Si Martinez nga mahimong mo-take oath sa bisan asang lugar apan duna gyuy implementing rules ug dili basta-basta pabarugon na siya (Martinez) sa akong luyo sa Kongreso ug aron manumpa, mangita siya og laing lingkuranan kay sa pagkakaron ako gihapon ang Kongresista,” matud pang Salimbangon.“I dont mine, I dont care mo-take-oath si Tining on Monday motambong ko sa sesyon kay ako paman officially nga kongresista,” dugang pa niini.
Ang legal council ni Salimbangon nga si Atty. Ramon Richel Delon Urot nagkanayon nakurat sa maong desisyon.Siya mibutyag ang pamilyang Martinez ni-file og MR sa HRET niadtong bulan sa Mayo apan gi-deny hinungdan nga didto nalang sila mi-file sa Korte Suprema.Apan matud ni Urot nga giduso nila ang ilang tubag niadto lang Disyembre 28, 2009 ug gikatakda unta ang first deliberation niadtong January 12 sa Comelec en Banc apan nahibulong siya nga ang desisyon sa Korte Suprema niana usab dayong adlawa.
Matud ni Urot nga klaro ug tataw kaayong wala mabasa ang ilang tubag sanglit Enero 12 man ang desisyon. (BANATNEWS)