72-anyos dakpan sa Gun ban

CEBU, Philippines - Usa ka 72-anyos ang nadakpang milapas sa Comelec Gun Ban human kini gireklamong nagmaoy ug nanghulga sa mga silingan diha sa barangay Tabunok sa lungsod sa Sogod kagahapon sa hapon.

Ang nadakpan giilang si Melecio Modequillo Sugarol, 72, nga taga sitio Suba Uno sa barangay Tabunok .

Matud pa ni SPO1 Elvis Archie sa Sogod Police Station sa Banat News nga may mireklamong silingan sa suspek nga nagpabuto kini og armas gumikan sa kahubog.

Giingong gipanghulga niini sa iyang armas nga .38 rebolber ang mga tawong masugatan hinungdan nga gipahibalo nila ang kapolisan ug kini nadakpan.

Ang suspek napakyas pagpakita og lisensya ingon man ubang dokumento nga naghimong legal ang pagdala niya sa maong armas hinungdan nga kini gitanggong karon sa karsel.

Base sa Comelec Gun Ban, ang madakpang makalapas niini di mahimong makapiyansa hangtud nga di malibkas ang gun ban.

Samtang sa laing bahin, usa ka Juanito Yunson, 31, nga taga barangay Ibo dakbayan sa Lapulapu nga nadakpan tungod sa paghupot og di lisensyadong .357 rebolber ang napasakaan na og kaso sa hukmanan.

Ang suspek gireklamo sa mga silingan nga nagpabuto niadtong milabay’ng semana.

Laing nadakpan sa gun ban mao si Efren Apul Fernandez, 46, taga barangay Cerdenia sa Malabuyoc human makuhai og .22 magnum rebolber nga may pito ka buhing bala nga walay lisensya atol sa checkpoint sa kapolisan niadtong Martes diha sa barangay Poblacion Dos sa maong lungsod.

Samtang aron higpitan ang pagpatuman sa gun ban, ug apilon sa kapolisan sa Talisay ang mga bars, imnanan ug balay kahilayan sa susihon human dunay alarma kagahapon sa kaadlawon kabahin sa usa ka tawong dunay dalang pusil nga misulod sa usa ka imnanan diha sa barangay Lawaan I apan wala na nila maabti. Ang Comelec gun ban nagsugod niadtong Enero 10, 2009 ug mapupos sa buwan sa Hunyo niining tuiga.

Si Supt. Henry Biñas, hepe sa Talisay City Police Station nga nahinabi sa Banat News nagkanayon nga hugtan usab nila ang pagpahigayon og checkpoints. ((BANATNEWS)