Ginang nahanaw napalgan patay na

CEBU, Philippines - Usa ka ginang nga dugay nang nawala ang napalgang patay sa duha ka lalaking nangita sa ilang binuhing sawa sa Purok 5 barangay Nangka lungsod sa Consolacion pasado alas 12 sa udto sa miaging adlaw.

Base sa taho nga nadangat sa Operations Branch sa Cebu Provincial Police Office (CPPO) ang maong ginang giila nga si Letecia Patalingro, 58, molupyo sa Purok 5, barangay Nangka lungsod sa Consolacion samtang ang nakakita kaniya mao sila si Lito Atin ug Noel Saldo.

Sumala pa sa maong taho usa ka Gerry Congson ang mitaho sa buhatan sa kapolisan sa Consolacion labot sa usa ka babaye nga napalgang patay duol sa koral sa luyong bahin sa Brizza Subdivision nga nagsugod na nga madugta. Matud pa nga samtang nangita sila si Atin ug Saldo sa ilang sawa nga nakabuhi sa may kasagbutan sa nahisgutang lugar nakit-an na lang nila ang patay'ng lawas sa biktima nga nagbuy-od sa kasagbutan nga inanay nang nadugta. Ang biktima positibong giila sa duha niini ka anak nga sila si Jerome ug Mary Grace Patalinghug tungod sa bayhon ug sa sapot nga gisul-ob niini ug miingon nga ang ilang inahan nawala sukad pa niadtong Septiyembre 17 sa miaging tuig. (Bryner Diaz, UV Journalism Intern)   (BANATNEWS)