Panghatag og health card sa Talisay way kontrol

CEBU, Philippines - Ang mga health card (HC) nga para sa mga kabus nga Talisaynon alang sa libreng tambal, giingong gipanghatag usab ngadto sa mga taga- Minglanilla gumikan sa walay maayong sistema sa pagpanghatag niini.

Gumikan sa giingong walay klarong control sa pagpang-apod-apod sa maong HC bisan ang taga-Minglanilla kinsa igo lang nangompra diha sa barangay Tabunok, nahatagan niini sa pagtuo sa nangapod-apod niini nga puro taga-Talisay ang mga tawo nga misuroy sa Tabunok.

Nasayran nga ang taga- Minglanilla igo lang miduol sa mga nangapod-apod sa maong mga HC ug diha-diha gihatagan sila niini.

Ang matag HC kabugti-an og Pl,500 nga kantidad sa mga tambal gikan sa Mercury Drugs sa Tabunok.

Gidudahan nga gisagolan kini og pamolitika gumikan lang kay ang mga mipirma kuno niini, mga trabahante nga nadestino sa opisina ni Mayor Socrates Fernandez.

Si Bise Mayor Alan Bucao sa pakighinabi sa Banat News kagahapon nagkanayon nga gituki nila kagahapon sa buntag uban ni Mayor Fernandez ug mga konsehal sa dakbayan ang maong isyu.

Matud pa ni Bucao nga gisugyot niya kang Mayor Fernandez nga ipakontrolar ang pagpang-apod-apod sa mga HC aron masiguro nga ang tanang makadawat niini pulos taga Talisay. Bisan ang mga namirma sa maong HC gisugyot usab ni Bucao nga mas maayong kailisan.

Kahinumdoman nga si Bucao kaniadto mikuwestion sa maong mga HC tungod kay samtang napatik niini ang mga ngalan sa mga opisyal sa administrasyon, ang kang kanhi bise Mayor Lani Abarquez kinsa kauban sa administrasyon giingong wala diha sa maong HC. - Brenda D. Batuto uban ni Raymond Abarcas (BANAT NEWS)