Cordova di na area of concern - Sitoy

CEBU, Philippines - Si Kanhi Mayor Arleigh Sitoy sa lungsod sa Cordova mibutyag kagahapon nga dili na angayang ipaubos ang ilang lungsod sa area of concern sa kapolisan alang sa umaabot nga piniliay karong Mayo.

 Si Sitoy kinsa kandidato sa pagka-provincial board member sa ika-unom nga distrito sa lalawigan karong umaabot nga piniliay mipahigayon og press conference sa may Park Mall kagahapon ug nagkanayon nga malinawon kaayo ang ilang lungsod busa walay angayang kabalak-an ang katawhan ug ang kapolisan,

Giangkon ni Sitoy nga may mitumaw nga gamay nga sulirang politikanhon sa Corodova sa miaging piniliay dihang nakuhaan ang iyang sakyanan og mga armas de fuego ug ang giingong pagpamusil sa balay ni Danny Sinugbuhan nga kaatbang sa iyang amahang si Mayor Adilino "Addy" Sitoy. Apan nasulbad na ang tanan ug ang mga kaso nga gipasaka batok kaniya (Arleigh) gibasura na sa COMELEC, matud pa niya.

 Sa pagkakaron, walay nangahas sa pagpakig-atbang kang mayor Addy Sitoy, ang amahan ni Arleigh sa umaabot nga piniliay 2010, busa walay mahitabong kagubot sa maong lugar.

Midugang siya nga halos tanang mga dagkung politikanhong clan o pamilya sa Cordova mobubo sa ilang suporta sa amahan sa pagka-mayor , ug kaniya para sa pagka-miembro sa hunta probinsiyal sa umaabot nga election.

Busa nagkanayon si Sitoy nga dili angayang ipaubos pa sa area of concern ang Cordova ug gani misugyot siya nga mas maayong sutaon sa kapolisan aron hisayran nila ang hustong dagan sa politika sa lunsgod. -  BANAT NEWS