Politiko gidid-ang mosugat sa imahen, atol sa 'translacion'

CEBU, Philippines - Dili na unya makapatuyang og wadwad ang mga politiko atol sa pagsugat sa tinuig nga “Translacion” sa imahen ni Senior Sto. Niño sa dakbayan sa Sugbu ug sa pagdili sa imahen karong Biyernes diha sa Mandaue.

Ang maong kalihukan kabahin na sa tradisyonal nga pamaagi sa mga Sugbuanon atol sa kapistahan ni Senior Santo Niño, okasyon nga kaniadto paman ilabi na inig ka duol na ang piniliay di palabyon sa mga politikong buot mopapili pag-usab sa ilang mga posisyon.

Si Regal Oliva nga maoy overall chairman sa ‘translacion’ sa Imahen ni Senior Santo Niño ug sa Birhen sa Guadalupe nga gikatakdang pagahimuon karong Biyernes nga diin mag-abot ang Balaang Pamilya diha sa National Shrine of Saint Joseph sa barangay Centro sa Mandaue City.

Matud pa ni Oliva nga ang mga debotos nga dili mga politiko lamang maoy tugutang makasugat uban sa kaparian sa National Shrine of Saint Joseph.

Si Oliva mipasabot nga mao kini nauyonan sa kaparian ug mga kadagkoan sa relihiyosong pundok sa katilingban nga ang mga politiko nga naglakip sa piniling opisyal sa dakbayan gidid-an sa pagsugat sa imahen.

Ang mga politiko nga naglakip sa kasamtangang naghupot og katungdanan ug uban pang buot magpapili sa 2010 election maoy gidid-an sa pagtagbo sa imahen sa paghidangat niini sa utlanan nga bahin sa barangay Subangdaku gikan sa dakbayan sa Sugbo.

Gipasabot niyang mahimo lamang motagbo ang mga politiko sa imahen sa paghidangat na niini sa simbahan sa National Shrine of Saint Joseph sa barangay Centro sa nahisgutang dakbayan.

Pagka-Sabado sa buntag himuon usab ang fluvial procession diin si Senior Sto. Niño ug Birhen sa Guadalupe isakay sa galeyon pabalik sa dakbayan sa Sugbu diha sa Mactan Channel nga manukad sa Ouano Wharf sa barangay Looc sa nahisgutang dakbayan. – BANAT NEWS