CEBU, Philippines - Walay klase sa tanang pampublikong mga tunghaan sa elementarya ug sekondarya sa dakbayan sa Sugbu karong umaabot nga Lunes human sa Sinulog 2010.Kini maoy gipadayag ni DepEd-7 director Recaredo Borgonia human usab mohangyo niini si City Schools Division Superintendent Doctor Rhea Mar Angtud. Gusto ni Angtud nga ikunsiderar ni Borgonia nga rest day ang adlaw'ng Lunes sa mga public elementary ug high school sa siyudad aron makapahuway ang mga tinun-an ilabi na niadtong miapil sa mga contingent nga misalmot sa Sinulog 2010.Sa iyang bahin, gipadayag ni Borgonia nga siya mo-issue og memorandum karong adlawa nga magdeklarar nga walay klase sa publikong mga tunghaan sa dakbayan.Samtang gipadayag sa DepEd-7 director nga iyang hatagan og katungod ang mga pribadong tunghaan nga mosuspenso sa ilang klase karong Lunes. Gipahibawo usab ni Borgonia nga ang publikong mga tunghaan sa probinsya nga dunay participating contingents mahimo usab nga dili magklase sa maong adlaw.Gitataw hinuon sa DepEd-7 director nga ang dili magklase karong Lunes kinahanglang mopahigayon og make-up classes.“I will issue a memorandum for that matter considering that classes will be disturbed but they have to comply with the required number of school days,” matud pa ni Borgonia.Giklaro ni Borgonia nga ang mga tunghaan sa elementarya ug high school kinahanglang motuman sa 204 nga school days matag tuig. – BANAT NEWS