14 ka tawo nangayo'g police escorts - Buac

CEBU, Philippines - Duna nay 14 ka mga politiko ug indibidwal ang mi-apply sa regional director sa Comelec-7 nga mokuha og ‘security detail’ nunot sa umaabot nga piniliay sa Mayo.

Matud pa ni Atty. Rene Buac, ang regional director sa Comelec-7 nga adunay duha ka businessman nga mi-apply og security detail ug ang 12 pulos mga politiko.

Dugang pa ni Buac nga sugod niadtong Enero 10 ang mga security officers nga nagserbisyo sa mga elected officials gipangkuha na sa kapolisan ug Comelec ug gihulipan nalang og tag-duha ka temporaryong police escorts samtang gihikay pa ang ilang aplikasyon sa pagpangayo og security escorts diha sa Police Regional Office-7 ug sa Comelec.

Ang temporary police escorts mobantay kanila sulod lamang sa 30 ka adlaw. Kun di mamatud-an sa imbestigasyon ug threat evaluation sa kapolisan sa hulga sa kinabuhi sa mi-request niini dili na sila hatagan og security escorts hasta ang duha ka temporary police escorts.

Mibutyag usab si Buac nga mobayad ang kandidato o indibidwal og P5 mil alang sa pagkuha og security detail maaprubahan man o dili.

Samtang mibutyag usab ang Police Regional Director Lani-O Nerez nga dunay pipila ka bahin sa Central Visayas nga ilang gibutang nga ‘hotly contested areas’ ug padayong gi-monitor ilabi na nga hapit na ang eleksyon.

Matud pa ni Chief Supt. Nerez nga adunay 13 ka lugar sa Central Visayas nga ilang gi-monitor. Tulo ka kategoriya ang himuong basehanan sa awtoridad sa pagdeklarar sa sitwasyon sa lugar atol sa eleksyon. Ang category 1 mao ang mga dapit nga duna nay history sa election violence tungod sa kahigpit sa panagribal sa mga politiko nga miresulta na sa pinatyanay, samtang ang category 2 mao ang mga lugar nga may presensya sa mga rebelde nga sagad nang manglawgaw sa panahon sa eleksyon ug ang category 3 mao ang presensya sa mga private armies nga wala pa nakita nganhi sa Central Visayas. – BANAT NEWS