Gwen di pasayawon sa Sinulog

CEBU, Philippines - Si environmental lawyer Benjamin Cabrido ug si Fr. Tito Soquiño, ang executive director sa The Santo Niño Augustinian Development Foundation dakong supak nga mosayaw si Gov. Gwen Garcia sa Sinulog Mardigras karong umaabot nga Domingo.

 Kini tungud kay matud pa wala mahaum ang baruganan ug prinsipyo sa gobernador sa tema sa Sinulog 2010 nga kabahin sa pagproteher sa kalikopan.

 Sayo niini si Fr. Soquiño nagpadala og sulat kang Ike Durano, usa sa mga komentarista sa DyRF Radyo Fuerza nga nagpahibawo nga ang tema karon sa Sinulog 2010 mao ang pagproteher sa kalikopan agi og pagtuman sa awhag ni Pope Benedict XVI.

 "At this month's Sinulog, we will be pushing for care of the environment, in keeping with the urging of Pope Benedict XVI, in his message for the International Day of Peace, and Cebu Archbishop Ricardo Cardinal Vidal in his homilies. The novena mass on January 11, 2010 will revolve around the theme of ecological care. We call on everyone to help save the environment, by praying with us during the novena mass for our beloved Sto. Niño," nagkanayon si Fr. Soquiño sa iyang sulat sa DyRF.

 Matud pa ni Cabrido nga dili angayan nga makasayaw ang gobernador tungod sa iyang pagsuporta sa coal power plant sa Korean Electric Power Corp.( KEPCO) didto sa dakbayan sa Naga.

Midugang siya nga ang pagtambak og coal ash ngadto sa napalit sa Kapitolyo nga 25 ka ektaryang lote didto sa barangay Tinaan, sa mao gihapong dakbayan, naghatag og kadaot sa panglawas sa katawhan ug sa kalikopan sa maong lugar.

 Matud pa ni Cabrido nga ang pagsayaw sa gobernador sama ra nga nagpadasig kini aron labing madaot ang kalikopan tungod sa lig-ong baruganan niini paghatag og pabor sa coal power plant project sa Naga.

"Iyaha rang konsiyensiya ang magtukmod niya kun angayan ba siyang mosayaw nga ang iyang gibuhat dili man consistante sa tema karon sa pagselebrar sa kapistahan sa Sto. Niño", sigon ni Cabrido sa interview sa DyRF.

 Samtang ang Banat Sugbu program sa DyRF uban nila ni Arnel Bacalan ug Tony Avila mipahigayon og survey niadtong miaging adlaw pagkuha og pulso sa mga Sugbuanon kun angayan bang pasayawon o dili si Gobernador Garcia sa Sinulog.

 Ang resulta sa survey nagpakita nga 82 ang supak , samtang pito lamang ang miuyon.

 Sigon pa sa mga misupak nga hilasan kuno silang magtan-aw nga mosayaw ang gobernador, kay mawala kuno ang kasagrado sa kapistahan sa Sr. Santo Niño .

Apan ang tigpamaba sa Kapitolyo, Rory Jon Sepulveda mipakagamay sa maong isyu tungod kay natubag na ug napasabot na sa gobernador ang nahisgutang environmental issue nga gituki ni Cabrido.

 Matud pa ni Sepulveda nga ang kagamhanan sa lalawigan andam nga mopaundang sa paggamit sa coal ash gikan sa KEPCO kun may mga makapamatuod   nga makadaot kini sa panglawas sa katawhan."

 Dugang pa ni Sepulveda nga ang reclamation project sa Balili Properties diin tukoron ang gilaraw nga international port magpadayon apan dili pa kini patambakan og coal ash tungod kay napalit na kini sa mga pabrika og semento sa Sugbu.

 Sa sayo pa si Gobernador Garcia misaad nga mosayaw siya ug mosalida atol sa Sinulog tungod kay iya na kining panaad sa mahal nga Sr. Santo Niño dinhi sa Sugbu. - Chester Abadilla (BANAT NEWS)