Koreano naghikog sa kapilya

CEBU, Philippines - Ang kalisod sa kuwarta maoy gipasanginlang hinungdan nganong naghikog ang usa ka Koreano atubangan sa kapilya ni Sta. Rita sa Doña Rita Village, barangay Banilad, siyudad sa Sugbo pasado alas 5 kagahapon sa buntag.

Si Kim Youngkeun, 29, kasamtangan nga nagpuyo sa nahisgutang lugar nakit-an sa caretaker sa village nga si Jacky Villaflor nga nagbitay atubangan sa pultahan sa kapilya sa nahisgutang lugar nga wala nay kinabuhi.

Daling mitaho sa guwardiya nga nagbantay sa maong village si Villaflor ug mao na usab kini ang nagpahibalo sa kapolisan.

Ang balay nga giabangan ni Youngkeun ug ang kapilya may gilay-on nga 300 metros.

Ang gigamit sa paghikog ni Youngkeun mao ang upat ka necktie nga gisumpay-sumpay ug gihigot ang tumoy sa railings sa pultahan sa entrance sa kapilya.

Gisusi sa kapolisan ang cellphone ni Youngkeun ug nasota nga adunay babaye nga nag-text sa Koreano sa wala pa kini magpakamatay.

Ang kapolisan na maoy mipahibalo sa ka-text ni Youngkeun nga patay na ang Koreano.

Atol sa pakigkita sa maong babaye (ngalan gipugngan sa kapolisan), nasayran nga aduna diay kini relasyon sa Koreano sulod sa upat na ka tuig.

Nasayran nga ang maong relasyon ni Youngkeun ug sa babaye adunay pagtugot sa bana sa maong babaye.

Atol sa pagsukitsukit sa kapolisan, mitug-an ang babaye nga sa katapusang semana pa sa Disyembre mi-text si Youngkeun sa maguwang niini sa Korea ug mihangyong magpatabang tungod kay nagkalisod na kini og kuwarta. Iyang nasayran nga wala kini tabangi sa Koreano nga giingong gikahiubos niini.

Matud ni SPO4 Alex Dacua sa Homicide Section nga posibleng ang kahiubos sa iyang igsuon ug ang problemang pinansiyal maoy nagtukmod ni Youngkeun pagkutlo sa kinabuhi.

Nasayran sa Banat News nga ang kaso ni Youngkeun ikatulo na nga Koreano nga nagkutlo sa kinabuhi tungod sa problema sa kuwarta tungod kay sulod sa milabay’ng pipila ka tuig adunay Koreano sa Talamban nga nagbitik og pisi sa liog ug namatay.

Niadtong Pebrero 21, 2009 laing Koreano nga si Chang Woo Kang, 45 nagkutlo sa iyang kinabuhi human kini wala na makabayad sa giabangang motel sa siyudad sa Lapulapu. Ang maong Koreano nagpusil sa kaugalingon ginamit ang kalibre .38 rebolber.   BANATNEWS)