CEBU, Philippines - Usa ka suspetsadong pusher og shabu diha sa barangay Bulacao, dakbayan sa Talisay ang nakaikyas sa gipahigayong pagpangronda sa kapolisan sa siyudad niadtong Sabado sa buntag.
Ang mga polis mi-warning shot dihang midugok ang mga tawo nga nagbitbit og mga bato apan ang komosyon maoy nakaingon nga nakaeskapo ang subject sa operasyon nga naila lang sa pangalang “Tata” nga residente sa maong lugar.
Ang grupo ni Sr. Insp. Isagani Abalo uban nila ni PO3 Benedicto Lasque, PO2 Erwin Denila ug PO2 Roy Lofranco ubos sa koordinasyon sa Philippine Drugs Enforcement Agency (PDEA)-7 mipahigayon og buy-bust operation batok kang Tata.
Si PO2 Lasque maoy mibarog nga poseur buyer gamit ang P200 nga marked money ug human gitunol ni Tata ang usa ka gamay'ng paketeng may sulod nga gituuhang shabu ngadto kang PO3 Lasque gilayog dayon kini ni Lasque.
Apan gilupig si Lasque sa kusog dihang mikisi-kisi kini hinungdan sa pagkabun-og sa mga kamot ug tiil sa maong polis ug nabuhian kini.
Diha-diha kalit nga midugok ang mga silingan sa suspetsado nga nagbitbit og mga bato hinungdan nga napugos og pabuto ang mga polis apan wala na nila maapsi pa si Tata. – BANAT NEWS