Mga turista sa Sugbo nagsugwak

CEBU, Philippines - Luyo sa mga nanurok mao ra'g uhong nga mga hotel ug pension house dinhi sa dakbayan sa Sugbo, gikuwang lang gihapon kini tungod sa nagdasok ug naghinobra kadaghang turista nga mosaksi sa Sinulog karong Enero 17.

Si Cristina Pañares, officer-in-charge sa dakong hotel sa may Osmeña Boulevard mibutyag sa Banat News nga mikabat na sa 80 porsiyento ang mga turista nga nagpa-booked sa ilang buhatan nga naglangkob sa mga langyaw, mga balikbayan ug mga bakasyonista nga mosud-ong sa tinuig nga Sinulog. 

Samtang si Lyza Roa, kinsa maoy Marketing and Communication Assistant sa dakong hotel usab sa Mabolo mibutyag nga fully booked na ang ilang hotel sa mga langyaw ug lokal nga turista nga mosaksi sa Sinulog.

Dugang pa ni Roa nga wala makaapekto sa ilang operasyon ang kadaghan sa mga bag-ong hotel ug mga pension house nga gipanukod ning dakbayan tungod sa ka- grabe kadaghang mga turista nga anaa mosaka sa ilang hotel.

Sama sa milabay nga katuigan andam na ang mga hotel ug mga pension house sa modagsang mga turista nga motan-aw sa Sinulog dinhi sa dakbayan, matud pa ni Roa. – BANAT NEWS