CEBU, Philippines - Nagtingkagol sa Talisay City detention cell ang 42-anyos nga babaye kinsa nailhang negosyante og shabu human kini hidakpi atol sa ronda nga gipahigayon sa mga sakop sa Provincial Anti-Illegal Drugs Special Operation Task Group (PAIDSO-TG) didto sa sitio Tunga, barangay Tanke, dakbayan sa Talisay kagahapon sa buntag.
Ang team sa PAIDSO-TG nga gipangunahan ni Superintendent Larson Dichino misikop kang Aileen Bazar Simene, dalaga, apan may kapuyo nga taga Tunga.
Nasakmit sa grupo ni Dichino gikan sa balay ni Simene ang usa ka dako ug usa ka gamay nga mga pakete sa shabu ug duha ka longitudinal.
Kauban ni Dichino sa maong pagpangronda mao sila si SPO4 Ernesto Navales, SPO2 Roberto Canencia, SPO1 Edgar Causon, SPO1 Benjamin Sabelleta, SPO1 Isaias Cabuenas, PO3 Andrew Rellanos, PO2 Charles Gomez ug PO3 Romeo Ramas.
Ang maong mga polis kompleto og search warrant nga giluwat ni Regional Trial Court (RTC) Judge Edito Enemesio sa Branch 25, dakbayan sa Danao sa ilang pagronda sa balay sa suspetsado.
Si Cabuenas mibutyag sa Banat News kagahapon nga si Simene dugay nang nakarga sa ilang watch list ug sulod sa 11 ka adlaw nila kining gipanid-an.
Nasayran sa maong mga polis nga si Simene maka-dispose og lima ka bultong shabu matag semana.
Ang matag bulto sa shabu may gibug-atong lima ka gramo ug nagkantidad kini og P35,000, matud pa ni Cabuenas. (Brenda D. Batuto uban ni Raymond D. Abarcas UV Journalism Intern) (BANATNEWS)