BoC, PDEA ug shippers mosusi sa container

CEBU, Philippines - Nagkahiusa ang Bureau of Customs Port of Cebu kun BOC-POC ug Philippine Drug Enforcement Agency sa kampanya alang sa pagsumpo sa pagpalusot sa illegal nga drugas ug mga chemical niini nga moagi sa tugpahanan ug sa dungoanan sa Cebu International Port kun CIP.

 Nagtagbo ang duha ka ahensiya sa milabay’ng adlaw sa buhatan sa BOC-POC uban sa bag-ong District Collector nga si Ronnie Silvestre ug Dangerous Drugs Board acting Secretary Clarence Paul Oaminal ug mga kadagkuan sa International Shipping Lines pinangulohan sa ilang presidente nga si Atty. Max Cruz.

 Lakip sa mitambong sa maong kalihukan mao si Police Center for Aviation Security PCAS-7 director Supt. Joselito Salido, ESS Cebu Customs Police District Commander Capt. Jerry Arizabal, Deputy Collector for Operation Atty. Paul Alcazaren ug mga department heads sa buhatan sa BOC-POC.

Ang maong panagtagbo maoy unang higayon nga gihimo aron pag-monitor ug pagsumpo sa posibleng palusot sa illegal nga drugas ug mga sagol nga kemikal paghimo niini dinhi sa Sugbo.

Gipasabot ni Oaminal nga kinahanglan magtambayayong ang PDEA ug BOC sa kampanya sa gobiyerno sa pakiggubat sa illegal nga drugas ug usa niini ang pagsusi gyud sa mga kargamento moagi sa adwana.

Gihimong ehemplo ni Oaminal ang nahitabong palusot sa “Cocaine” didto sa dakbayan sa Davao ug sa Samar sa milabay’ng bulan sa Disyembre tuig 2009 nga nasignit sa mga operatiba sa BOC nga gisud kini sa usa ka international container van.

Si Cruz mipadayag sa iyang suporta sa maong lakang ug mipadayag nga himuon nilang sayon alang sa BOC ug PDEA-7 ang pagpaabli sa kadudahang containers. (Bong Soriano)    (BANATNEWS)