Marina mosusi sa karaang lifejackets

CEBU, Philippines - Gisuportahan sa Maritime Industry Authority (Marina)-7 ang awhag ni Marina chairman Ma. Elena Bautista ngadto sa mga tag-iya og barko nga pailisan na ang mga karaang mga lifejackets diha sa ilang mga barko.

Matud ni Engineer Jesus Quinio, safety engineer sa Marina-7 nga ang kamandoan ni Bautista gibase sa mga reklamo sa mga sumasakay nga daghang mga barkong pasaheroan ang nagbaton pa gihapon og gubaon ug karaang mga lifejackets.

Sumala pa ni Quinio nga mohimo unya sila og inspeksyon sa tanang barkong pasaheroan sa Visayas kun may kamandoan na kalabot niini lakip na unya ang auditing sa tanang local shipping companies dinhi sa Sugbu labina ang ilang roll-on roll-off (RORO) vessels, kini aron pagtino kung mituman ba kini sa international safety standards.

Nagkanayon si Quinio nga sa pagkakaron naghuwat pa sila sa pormal nga direktiba gikan ni Bautista alang sa pagpahigayon sa maong auditing.

Ang kamandoan natigayon human sa sunod-sunod nga pagkalunod sa barko sa milabay’ng buwan sa Luzon nga ubay-ubay nga pasahero ang namatay. (Rey Pasaporte)   (BANATNEWS)